Sahil Coşqun oğlu Babayev 05 iyun 2002-ci ildə Şabran rayonunun Ceyranlı kəndində anadan olub. Uşaqlıq illərini doğulduğu kənddə keçirib. 1 bacı və 1 qardaş olmaqla ailədə 4 nəfər olublar. Orta təhsilini Ceyranlı kənd tam orta məktəbində alıb və təhsilini başa vurduqdan sonra, 07 iyul 2020-ci ildə Şabran rayon Hərbi komissarlığı tərəfindən həqiqi hərbi xidmətə çağırılıb, Vətənə xidmətə yola salınıb.

2020-ci il 27 sentyabr tarixində başlayan II Qarabağ müharibəsində Sahil də gənc əsgər olmağına baxmayaraq, böyük həvəslə iştirak edir. Düşmənə sarsıdıcı zərbələr endirir, xeyli sayda canlı qüvvəsini məhv edir. Qəhrəman əsgər Ağdərə, Suqovuşan istiqamətində gedən ağır döyüşlərdə düşmənə sarsıdıcı zərbələr endirir, xeyli sayda canlı qüvvəsini məhv edir. 20 oktyabr 2020-ci ildə əsgər Babayev Sahil Azərbaycan Respublikasının ərazi bütövlüyü uğrunda gedən ağır döyüşlərdə qəhrəmancasına şəhid olur. Şəhidin nəşi səhərisi gün, 21 oktyabrda doğulub, boya-başa çatdığı Ceyranlı kəndinə gətirilir və kənd qəbiristanlığında torpağa tapşırılır.

Prezident İlham Əliyev Azərbaycan Respublikası Silahlı Qüvvələrinin hərbi qulluqçularının medallarla təltif edilməsi haqqında imzaladığı Sərəncama əsasən, Azərbaycan Respublikasının ərazi bütövlüyünün təmin edilməsi uğrunda döyüş əməliyyatlarında iştirak etmiş və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirmiş Azərbaycan Respublikası Silahlı Qüvvələrinin hərbi qulluqçusu, Şabran rayonunun Ceyranlı kəndində anadan olan əsgər Sahil Coşqun oğlu Babayev ölümündən sonra “Suqovuşanın azad olunmasına görə” və  “Vətən uğrunda” medalları ilə təltif edilib. Allah rəhmət eləsin. Vətən sağ olsun!